logo
opentalk-logo

危疾、醫療保險要分清

「買個full plan就最適合你啦!危疾、醫療、住院現金、意外、意外收入… 樣樣都齊呀!」唔知大家有無比人sell過?而最後唔知頭唔知路,真係買咗!買完都唔知買咗咩!
其實當中有幾多樣野真正符合你需要?公主病人認為,醫療保險一定係首選!如果你仲未買,唔該你考慮快啲去買!公立醫院醫療事故頻繁,醫護人員人手不足,工作壓力大。有得揀當然去私家醫院。入住私家醫院嘅費用,就可以用醫療保險去賠償,實報實銷,即是用咗10萬就賠返10萬。無論係大事(癌症、通波仔)定小事(扭傷、腸胃炎)都幫到手,當然要睇返份計劃本身點賠法(每個項目有限額還是全數賠償)。用唔著就當捐比有需要嘅人!
記住!醫療保險 : 實報實銷 = 醫病時所需費用
既然醫療保險可以cover到大病同小病嘅費用,咁仲需唔需要危疾保險呢?「危疾保額至少要80萬以上,因為有統計指患上癌症需要用80萬來醫。」當日阿 Agent小姐/先生係咁講㗎!真係令人好亂呀,危疾保險又係用來醫病?
錯呀!錯呀!危疾保險唔係用來醫病!而係當你唔好彩,患上危疾(癌症、中風、心臟病等)時,一筆過賠償,例如買咗100萬保額就賠100萬。唔會規定你用筆錢來醫病,你喜歡拎去環遊世界都得!當然,一般係會用來做生活費,因為一旦患上危疾,未必可以繼續工作,就靠筆錢維持生活。如果你愛錫家人,又係家庭經濟支柱,建議你考慮一下危疾保險。而保額嘅計算,需要睇返你每年嘅收入,再乘以1.5 - 3倍,代表一年半至三年收入。買咗危疾保險,有事嘅時候都唔洗求人,唔需要周圍問人借錢生活,或者令家人擔心,可以繼續維持一段時間生活開支。
記住!危疾保險 : 一筆過賠償= 患病時候嘅生活費
以上嘅內容,講完又講都要再講!因為好希望大家知道自己買咗啲乜,而且買來做乜!唔好比完錢人賺,自己就傻下傻下。
有問題歡迎隨時聯絡我🤗
👍🏻即刻讚好、追蹤《理財公主病》
🔛Facebook: 理財公主病
🔛Instagram: wp_ill
📱Whatsapp: https://api.whatsapp.com/send?phone=85251659703
💌:iamwealthyprincess@gmail.com
熱門標籤
@wealth_notesss
分享理財資訊,以最低成本獲得最大保障。